Ný útgáfa 2017
„Landið var fagurt og frítt og fannhvítir jöklanna tindar…“
Þegar Jónas Hallgrímsson horfði til Hofsjökuls sumarið 1841, í einni af mörgum ferðum sínum um landið, óraði hann ekki fyrir því að hálfri öld síðar myndi útbreiðsla jökla á Íslandi ná hámarki. Jöklakort af Íslandi, sem Veðurstofa Íslands hefur gefið út, dregur fram sögu breytinga íslensku jöklanna. Kortið sýnir mestu útbreiðslu jöklanna á sögulegum tíma, sem víðast varð við hámark litlu ísaldar um 1890, hvernig þeir voru 1945-1946, um aldamótin 2000 og 2014. Á kortinu eru framhlaupsjöklar greindir frá hinum með sérstökum lit og merktar þær eldfjallaöskjur sem vitað er um undir jökli.
Jöklakortið af Íslandi er yfirlitskort af öllum jöklum landsins. Á Tröllaskaga, sem umlykur æskustöðvar þjóðskáldsins, er til að mynda að finna hátt í 180 smájökla sem margir hafa hingað til verið nafnlausir á landakortum. Hver veit nema Jónas hafi litið Hrafnabjargajökul eða Gálgagilsjökul eigin augum á ferð um heimaslóðir?
Bæklingur og örnefnaskrá fylgja kortinu. Þar er meðal annars greint frá stærð helstu jökla og stærðarbreytingum fram á 21. öld. Allt lesmál er á tveimur tungumálum, íslensku og ensku. Höfundar jöklakortsins eru Oddur Sigurðsson jarðfræðingur hjá Veðurstofu Íslands, Richard S. Williams Jr. jarðfræðingur hjá Stofnun Vilhjálms Stefánssonar á Akureyri og Skúli Víkingsson jarðfræðingur hjá ÍSOR. Kortahönnuður er Guðrún Sigríður Jónsdóttir hjá ÍSOR.
Yfirlitskort af öllum jöklum með örnefnum þeirra jökla sem nafn hafa fengið. Kortið sýnir breytingar á jöklum frá hámarki litlu ísaldar um 1890 til upphafs 21. aldar. Einnig er sýnd staða jöklanna um miðja 20. öld. Helstu eldfjöll, sem undir jöklunum liggja, eru merkt. Framhlaupsjöklar eru sýndir með sérstökum lit.
Mælikvarði: 1:500 000
Útgefið: 2017
Útgefandi: Veðurstofa Íslands
Stærð: 84 x 119 cm / Þyngd: 122 g.
Tungumál: Íslenska, enska, þýska og franska
